Apolo18

Apolo18 chegan dende A Coruña como unha das propostas máis interesantes da nova escena alternativa galega. Cun son que bebe do shoegaze, o grunge e o rock alternativo dos noventa, o quinteto constrúe unha identidade propia a base de guitarras distorsionadas, atmosferas envolventes e emoción sen filtros.

Co seu primeiro EP, Intentos de facer vida, demostran a súa capacidade para combinar intensidade, melancolía e letras en galego. Cancións como Salitre, Cinza ou incidente12 reflicten a personalidade dunha banda que está a facerse un oco na escena musical galega.

Tras un 2026 de crecemento e concertos por toda Galicia, Apolo18 regresan a Sarria para subir ao escenario do Esmorga Fest 2027 cun directo cargado de forza, emoción e guitarras.

Apolo18 son presente e futuro do rock alternativo galego. E no Esmorga Fest imos comprobalo en directo.