Joe Crepúsculo

Bailar e chorar. Chorar bailando. Iso é o que propón Joe Crepúsculo, o trovador tecno máis libre do Estado, que chega ao Esmorga Fest para presentar Museo de las Desilusiones, un disco no que o corazón late ao ritmo dun bombo, e a pista de baile convértese nun espello da alma.

Con letras que combinan filosofía, costumbrismo, ironía, ternura e rave, Crepus asina o que moitos xa consideran o seu álbum máis importante: un traballo que celebra as emocións sen filtro, que reivindica que estar triste non é incompatible con pasalo ben, e que bailar tamén pode ser unha forma de cura.

Autor de himnos eternos como Mi fábrica de baile, Pisciburguer ou Ritmo mágico, Joe Crepúsculo mestura mákina, synth-pop, canción de autor, reggaetón espiritual e Eurovisión sentimental, cunha naturalidade só ao alcance dos xenios.

Da fábrica de moldes ao escenario do Esmorga Fest, do karaoke á filosofía, da rave á canción protesta emocional: Crepus é unha festa rara, brillante e irrepetible, e vén a poñer o corazón da pista a latexar no décimo aniversario máis especial.